پاک افغان مذاکرات بے نتیجہ ختم، جنگ بندی برقرار رکھنے پر اتفاق

ریاض:پاکستان اور افغانستان کے درمیان سعودی عرب میں ہونے والے حالیہ مذاکرات کسی نتیجے پر نہ پہنچ سکے، تاہم دونوں ممالک نے جنگ بندی برقرار رکھنے پر اتفاق کیا ہے۔

غیر ملکی خبر رساں ایجنسی رائٹرز کے مطابق یہ بات چیت قطر، ترکیہ اور سعودی عرب کی میزبانی میں ہونے والے سلسلہ وار مذاکرات کا حصہ تھی، جن کا بنیادی مقصد اکتوبر میں سرحدی جھڑپوں کے بعد پیدا ہونے والی کشیدگی کو کم کرنا تھا۔

رپورٹ کے مطابق دوحہ میں طے پانے والی جنگ بندی اب تک بڑی حد تک قائم ہے، مگر گزشتہ ماہ استنبول میں ہونے والے فالو اپ مذاکرات میں فریقین طویل المدتی معاہدے تک پہنچنے میں کامیاب نہیں ہوسکے تھے۔ حکام کا کہنا ہے کہ حالیہ مذاکرات سعودی عرب کی ایک نئی پیشکش کے تحت منعقد کیے گئے۔

یاد رہے کہ اکتوبر میں پاک افغان سرحد پر جھڑپوں کے باعث متعدد افراد ہلاک ہوگئے تھے۔ پاکستان مسلسل مطالبہ کر رہا ہے کہ افغان طالبان تحریری طور پر یقین دہانی کرائیں کہ وہ پاکستان مخالف گروہوں کے خلاف کارروائی کریں گے، تاہم طالبان اس مطالبے پر آمادہ نہیں۔