عوام کے لیے خوشخبری، یکم دسمبر سے پیٹرول سستا ہونے کاامکان

اسلام آباد:عوام کے لیے خوشخبری ہے کہ یکم دسمبر سے پیٹرولیم مصنوعات کی قیمتوں میں واضح کمی کا امکان ہے۔
ذرائع کے مطابق پیٹرول کی قیمت میں 3 روپے 75 پیسے فی لیٹر جبکہ ہائی اسپیڈ ڈیزل میں 6 روپے 10 پیسے فی لیٹر کمی متوقع ہے۔ اسی طرح مٹی کے تیل کی قیمت میں 73 پیسے اور لائٹ ڈیزل آئل میں 6 روپے 35 پیسے فی لیٹر کمی کا امکان ہے۔
ذرائع کا کہنا ہے کہ آئل انڈسٹری نے قیمتوں میں ممکنہ ردوبدل کی ورکنگ مکمل کر کے اوگرا کو بھیج دی ہے۔ اوگرا انہی سفارشات کی بنیاد پر قیمتوں میں تبدیلی کی سمری تیار کر رہا ہے، جو کل وزارتِ خزانہ کو ارسال کی جائے گی۔
وزارتِ خزانہ پیٹرولیم مصنوعات کی نئی قیمتوں کا اعلان 30 نومبر کو کرے گی، جو یکم دسمبر سے آئندہ 15 دن کے لیے نافذ ہوں گی۔ ذرائع کے مطابق اعلان سے پہلے وزیراعظم سے مشاورت بھی کی جائے گی۔