سرفراز نواز کے چونکا دینے والے انکشافات سے پاکستانی کرکٹ میں طوفان

سابق ٹیسٹ فاسٹ بولر سرفراز نواز کی سوانح عمری سے پاکستان کرکٹ کے محاذ پر ایک اور ہلچل مچنے کا امکان پیدا ہو گیا ہے۔

لندن میں مقیم 76 سالہ سرفراز نواز نے اعلان کیا ہے کہ ان کی کتاب میں میچ فکسنگ سمیت ایسے چونکا دینے والے انکشافات شامل ہوں گے جو شائقین کرکٹ کے لیے حیران کن ہوں گے۔

سوشل میڈیا پر جاری ویڈیو بیان میں ریورس سوئنگ کے بانی سرفراز نواز نے کہا کہ وہ وہ حقائق منظرِ عام پر لا رہے ہیں جو برسوں تک سایوں میں چھپائے گئے تھے۔

انہوں نے مزید کہا، “میں اُس خفیہ دنیا سے پردہ اٹھا رہا ہوں جسے جوا مافیا نے طویل عرصے تک چھپایا رکھا۔ میں اکیلا کھڑا رہا اُن لوگوں کے خلاف جو خاموشی سے کھیلوں کو اپنے مفاد کے لیے موڑتے رہے۔”

سرفراز نواز نے واضح کیا کہ اب وہ سب کچھ کہہ رہے ہیں جسے دوسروں نے کہنے کی ہمت نہیں کی، اور یہ سچائیاں اب عوام کے سامنے ہیں۔

واضح رہے کہ سرفراز نواز نے پاکستان کی نمائندگی 55 ٹیسٹ اور 45 ایک روزہ میچز میں کی ہے، اور وہ ریورس سوئنگ کے موجد کے طور پر بھی جانے جاتے ہیں۔