وفاقی آئینی عدالت کے چیف جسٹس امین الدین نے پہلا اہم فیصلہ جاری کر دیا

اسلام آباد:وفاقی آئینی عدالت کے چیف جسٹس امین الدین خان نے اپنے منصب سنبھالنے کے بعد پہلا اہم انتظامی فیصلہ کرتے ہوئے عدالت کا نیا رجسٹرار تعینات کر دیا ہے۔ ذرائع کے مطابق چیف جسٹس نے سابق ڈسٹرکٹ اینڈ سیشن جج محمد حفیظ کو رجسٹرار وفاقی آئینی عدالت مقرر کیا ہے۔

ذرائع کا مزید کہنا ہے کہ چیف جسٹس امین الدین خان نے مظہر بھٹی کو سیکریٹری ٹو چیف جسٹس کے عہدے پر بھی تعینات کر دیا ہے، جس کے بعد عدالت کے ابتدائی انتظامی ڈھانچے کی تشکیل کا عمل تیزی سے آگے بڑھ رہا ہے۔

یہ بھی بتایا گیا ہے کہ وفاقی آئینی عدالت کے نئے نامزد جج جسٹس کے کے آغا کل اپنے عہدے کا حلف اٹھائیں گے۔ ان سے حلف چیف جسٹس امین الدین خان لیں گے، جبکہ حلف برداری کی تقریب اسلام آباد ہائی کورٹ میں منعقد ہوگی۔

یہ تعیناتیاں اس امر کی نشاندہی کرتی ہیں کہ نئی قائم ہونے والی آئینی عدالت عملی طور پر کام کا آغاز کر چکی ہے اور انتظامی معاملات کو جلد از جلد مستحکم کرنے کی کوششوں میں مصروف ہے۔