News Wave 
لاہور: پنجاب میں رنگ دار کوڑے دان کے استعمال کا حکم
پنجاب حکومت نے اعلان کیا ہے کہ اب تمام بازار، شاپنگ مالز، تجارتی مراکز، سرکاری دفاتر اور تعلیمی اداروں میں رنگ دار کوڑے دان لگائے جائیں گے، تاکہ کچرے کو جمع کرنے اور الگ کرنے کا نظام بہتر بنایا جا سکے۔
حکام کے مطابق پہلے مرحلے میں ’سمارٹ ویسٹ مینجمنٹ پراسیس‘ گزشتہ سال ستمبر سے پنجاب کے سرکاری اور نجی تعلیمی اداروں میں نافذ کیا جا چکا ہے۔
حکومتی حکم کے مطابق رنگ دار کوڑے دان نہ لگانے کی صورت میں ماحولیاتی ادارہ قانون کے مطابق کارروائی کرے گا۔ کوڑے دانوں کی تفصیل اس طرح ہے:
پیلا: کاغذ، پیکنگ کا سامان اور ردی
سبز: بوتلیں، کانچ کے ٹکڑے اور لیبارٹری کا ضائع شدہ سامان
گرے (سُرمئی): پھلوں کے چھلکے، ضائع شدہ کھانا، پتے اور سبزیاں
لال: لوہے اور دھاتی کوڑا
اورنج: پلاسٹک ویسٹ، تاکہ اسے دوبارہ استعمال کیا جا سکے
اس جدید نظام کا مقصد کچرے کی مقدار کم کرنا اور ماحول دوست رویے کو فروغ دینا ہے۔
عوام پنجاب مینجمنٹ ہیلپ لائن 1139 پر رابطہ کر کے تعلیمی اداروں سے کچرا اٹھانے کی سہولت حاصل کر سکتے ہیں۔
لوکل گورنمنٹ اینڈ کمیونٹی ڈویلپمنٹ ڈیپارٹمنٹ اور ماحولیاتی تحفظ کا ادارہ (EPA) اس حکم نامے کے مؤثر نفاذ کو یقینی بنائیں گے۔