میٹا کا نیا تحفہ، انسٹاگرام پر ’’اے آئی‘‘ فوٹو و ویڈیو ایڈیٹنگ فیچر متعارف

سوشل میڈیا پلیٹ فارم انسٹاگرام نے اپنی اسٹوریز میں میٹا کی جانب سے تیار کردہ آرٹیفیشل انٹیلی جنس (اے آئی) ویڈیو اور فوٹو ایڈیٹنگ ٹولز متعارف کرا دیے ہیں۔

انسٹاگرام کے جاری کردہ بیان کے مطابق، صارفین اب صرف ٹیکسٹ پرامپٹس لکھ کر اپنی تصاویر یا ویڈیوز میں نئی اشیاء شامل کر سکتے ہیں، غیر ضروری چیزوں کو ہٹا سکتے ہیں یا پوری تصویر کا انداز بدل سکتے ہیں۔

اس سے قبل انسٹاگرام پر اے آئی ایڈیٹنگ ٹولز چیٹ بوٹ کے ذریعے محدود فیچرز کے ساتھ دستیاب تھے، جو استعمال میں کچھ پیچیدہ تھے۔

تاہم اب یہ نیا فیچر براہِ راست انسٹاگرام اسٹوریز میں شامل کر دیا گیا ہے، جس سے صارفین کا ایڈیٹنگ کا تجربہ تیز اور آسان ہو گیا ہے۔

یہ فیچر استعمال کرنے کے لیے صارف کو اسٹوری ایڈیٹر میں موجود پینٹ برش آئیکون پر ٹیپ کرنا ہوگا، جہاں اوپر دکھائی دینے والے ‘ری اسٹائل’ مینیو میں ایڈ، ریموو یا چینج کا آپشن دستیاب ہوگا۔ اس کے بعد صارف پرامپٹ بار میں تحریری ہدایات دے کر اے آئی سے اپنی مرضی کے مطابق تبدیلیاں کر سکے گا۔

انسٹاگرام نے اس فیچر میں پری سیٹ ایفیکٹس بھی شامل کیے ہیں، جن کے ذریعے صارفین اپنی تصاویر یا ویڈیوز میں کپڑوں کی تبدیلی یا انداز میں فرق لا سکتے ہیں۔

مزید برآں، یہ اے آئی ٹولز تصاویر کو بالکل نئے آرٹسٹک اسٹائلز میں ڈھالنے کی صلاحیت رکھتے ہیں، مثلاً سن گلاسز یا بائیکر جیکٹ شامل کرنا، یا کسی تصویر کو واٹر کلر پینٹنگ جیسا بنانا اب ممکن ہو گیا ہے۔

میٹا نے حال ہی میں اپنے دیگر پلیٹ فارمز جیسے فیس بک، واٹس ایپ اور تھریڈز پر بھی اے آئی فیچرز متعارف کرائے ہیں۔ ساتھ ہی، میٹا اے آئی کا ویب ورژن بھی لانچ کر دیا گیا ہے، جس میں صارفین اب اردو زبان میں معلومات تلاش کر سکتے ہیں۔